Форум сайта братства во имя священномученика митрополита Владимира.

Сiя Вѣра Апостольская, сiя Вѣра Отеческая, сiя Вѣра Православная, сiя Вѣра вселенную утверди. Еще же Соборы Святыхъ Отецъ и ихъ преданiя и писанiя Божественному Откровенiю согласная, прiемлемъ и утверждаемъ. Аще сему Господню о насъ Промышленiю и Откровенiю спасительному врази Православiя и противишася, но помяну Господь поношенiя рабъ Своихъ; хульники бо Славы Своея поруга, и продерзатели и враги Православiя боязненны и бѣжатели яви.
Якоже убо плѣняющихъ разумъ свой въ послушанiе Божественному Откровенiю и подвизавшихся за оное ублажаемъ и восхваляемъ; тако противящихся сей Истинѣ, аще ожидавшему ихъ обращенiя и раскаянiя Господу не покаяшася, Священному Писанiю послѣдующе и первенствующiя Церкве Преданiй держащеся, отълучаемъ и анафематствуемъ.

(1) Отрицающимъ Бытiе Божiе и утверждающимъ, яко мiръ сей есть самобытенъ, и вся въ немъ безъ Промысла Божiя и по случаю бываютъ, анафема, трижды.
(2) Глаголющимъ Бога не быти духъ, но плоть; или не быти Его Праведна, Милосерда, Премудра, Всевѣдуща, и подобная хуленiя произносящимъ, анафема, трижды.
(3) Дерзающимъ глаголати, яко Сынъ Божiй не Единосущный и не Равночестный Отцу, такожде и Духъ Святый, и исповѣдающимъ Отца, и Сына, и Святаго Духа, не Единаго быти Бога, анафема, трижды.
(4) Безумнѣ глаголющимъ, не нужно быти ко спасенiю нашему и ко очищенiю грѣховъ пришествiе въ мiръ Сына Божiя во плоти и Его вольное Страданiе, Смерть и Воскресенiе, анафема, трижды.
(5) Не прiемлющимъ Благодати Искупленiя Евангелiемъ проповѣданнаго, яко единственнаго нашего ко оправданiю предъ Богомъ Средства, анафема, трижды.
(6) Дерзающимъ глаголати, яко Пречистая Дѣва Марiа не бысть прежде рождества, въ рождестѣ и по рождествѣ Дѣва, анафема, трижды.
(7) Не вѣрующимъ, яко Духъ Святый умудри Пророковъ и Апостоловъ, и чрезъ нихъ возвѣсти намъ Истинный Путь къ Вѣчному Спасенiю, и утверди сiе Чудесами, и нынѣ въ сердцахъ вѣрныхъ и истинныхъ Христiанъ обитаетъ и наставляетъ ихъ на всякую Истину, анафема, трижды.
(8) Отметающимъ безсмертiе души, кончину вѣка, Судъ Будущiй и воздаянiе вѣчное за добродѣтели на Небесѣхъ, а за грѣхи осужденiе, анафема, трижды.
(9) Отметающимъ Таинства Святая, Церковiю Христовою содержимая, анафема, трижды.
(10) Отвергающимъ Соборы Святыхъ Отецъ и ихъ преданiя, Божественному Откровенiю согласная и Православно-Кафолiческою Церковiю благочестно хранимая, анафема, трижды.
(11) Помышляющимъ, яко Православнiи Государи [Помазанники Божии] возводятся на Престолы не по особливому о Нихъ Божiю Благоволенiю, и при Помазанiи Дарованiя Святаго Духа къ прохожденiю великаго сего [Царского] Званiя въ Нихъ не изливаются; и тако дерзающимъ противу Ихъ на бунтъ и измѣну, анафема, трижды.
(12) Ругающимъ и хулящимъ Святыя іконы, ихже Святая Церковь ко воспоминанiю Дѣлъ Божiихъ и Угодниковъ Его, ради возбужденiя взирающихъ на оныя ко Благочестiю, и ко оныхъ подражанiю прiемлетъ, и глаголющимъ оныя быти iдолы, анафема, трижды.

Всѣмъ же о Православiи подвизавшимся словесы, писанiи, ученiи, страданiи и Богоугоднымъ житiемъ, яко защитникомъ и пособникомъ онаго, Христова Церковь, лѣтнее воспоминанiе творящи, восклицаетъ:
Святому Благовѣрному и Равноапостольному ЦАРЮ Константiну, и матери Его Еленѣ, Православнымъ Греческимъ ЦАРЕМЪ: Великому Феодосiю, Феодосiю Юнѣйшему, Іустiнiану, и прочимъ Православнымъ ЦАРЕМЪ и ЦАРИЦАМЪ Греческимъ, вѣчная память, трижды.
Благовѣрному и Равноапостольному великому князю Владимiру, Благовѣрнѣй велицѣй княгинѣ Ользѣ, и прочимъ Благовѣрнымъ Царемъ и великимъ княземъ, Царицамъ и великимъ княгинямъ, и всѣмъ отъ рода Царей и великихъ князей Россiйскихъ преставльшимся, вѣчная память, трижды.
Благочестивѣйшимъ Государемъ ІМПЕРАТОРОМЪ: Петру Первому, Петру Второму, Петру Третiему, Павлу Первому, Александру Первому, Нiколаю Первому, Александру Второму и Александру Третiему, и Благочестивѣйшимъ Государынямъ IМПЕРАТРIЦАМЪ: Екатерiнѣ Первѣй, Аннѣ Іоанновнѣ, Елiсаветѣ Петровнѣ, Екатерiнѣ Второй, Елiсаветѣ Алексiевнѣ, Марiи Феодоровнѣ, Александрѣ Феодоровнѣ, и Марiи Александровнѣ, вѣчная память, трижды.
Святѣйшимъ Патрiархомъ Константiнопольскимъ, Александрийскимъ, Антiохiйскимъ, Іерусалимскимъ и Всероссiйскимъ, и Преосвященнымъ Митрополiтомъ, Архiепiскопомъ и Епiскопомъ Православнымъ, вѣчная память, трижды.
Пострадавшимъ и убiеннымъ въ различныхъ походѣхъ за Православную Вѣру и Отечество княземъ, боляромъ, Христоименитому воинству и всѣмъ Православнымъ Христiаномъ въ Истиннѣй Вѣрѣ и Благочестiи и въ надежди Воскресенiя скончавшимся, вѣчная память, трижды.
Православная Христова Церковь, торжественно воспоминающи подвизавшихся во Благочестiи, и сiе всѣмъ своимъ Христоименитымъ чадомъ къ подражанiю представляющи, имѣетъ такожде долгъ восхваляти подвиги сихъ, иже нынѣ, спасительною Вѣрою и Добродѣтелiю приуготовляюще себе къ Вѣчному Блаженству, утверждаютъ Православiе.

Христiанскаго Благочестiя Ревнителю, Защитнику и Покровителю Христовы Церкве, Благочестивѣйшему, Самодержавнѣйшему, Великому Государю нашему IМПЕРАТОРУ, (имярекъ), Самодержцу Всероссiйскому, и иныхъ странъ Государю и обладателю, подаждь, Господи, благоденственное и мирное житiе, здравiе же и спасенiе и во всемъ благое поспѣшенiе, на враги же побѣду и одолѣнiе, и сохрани ЕГО на многа лѣта. Многая лѣта, 9-ть разъ.
И Супругѣ ЕГО, Благочестивѣйшей Государынѣ Імператрiцѣ (имярекъ), Матери ЕГО, Благочестивѣйшей Государынѣ Імператрiцѣ (имярекъ): Благовѣрному Государю Наслѣднику и Великому Князю (имярекъ), и всему Царствующему Дому, многая лѣта, трижды.
Святѣйшему Правительствующему Всероссiйскому Синоду, многая лѣта, трижды.
Святѣйшимъ Патрiархомъ Православнымъ: Константинопольскому, Александрiйскому, Антiохiйскому и Іерусалимскому, многая лѣта, трижды.
Преосвященному, (имярекъ), многая лѣта, трижды.
Преосвященнымъ Православнымъ Митрополiтомъ, Архиепископомъ и Епiскопомъ и всему освященному причту, многая лѣта, трижды.
Благовѣрнымъ, Правительствующему Сигклиту, военачальникомъ, градоначальникомъ, Христолюбивому воинству и всѣмъ Православнымъ Христiаномъ, Право содержащимъ спасительную Вѣру и повинующимся Христовѣй Церкви, подаждь, Господи, миръ, тишину, благоденствiе, изобилiе плодовъ земныхъ и многая лѣта, трижды.
Святая Троице, сихъ прослави и утверди даже до конца въ Правовѣрiи; развратники же и хульники Православныя Вѣры и Христовы Церкве и не повинующияся онѣй обрати, и сотвори, да прiидутъ въ познанiе Вѣчныя Твоея Истины, молитвами Пресвятыя Владычецы нашея Богородицы и Приснодѣвы Марiи и всѣхъ Святыхъ. Аминь.


Послѣдованiе в Недѣлю Православiя. С-Пб., 1904 годъ.

_________________
Свет Христов просвещает всех.